Código de conduta na operación da canle

Última actualización: 30 de xullo de 2026

Esta é unha tradución de cortesía. En caso de discrepancia entre versións prevalece o texto en español, que é o único revisado por un xurista. Ver a versión en español

Esta sociedade opera canles internas de información conforme á Ley 2/2023, de 20 de febrero, e ao Regulamento (UE) 2016/679. Este código recolle os compromisos que asume nesa condición.

Non substitúe o código ético de ningunha organización cliente: cada unha ten o seu, e é ese —non este— o que determina que condutas poden comunicarse pola súa canle. Aquí só se fala de como se opera a canle.

1. Confidencialidade da identidade

A identidade de quen informa, e a de calquera terceiro mencionado, é confidencial. Non se revela á persoa afectada pola información, nin a terceiros, nin á propia organización máis alá de quen estea designado para xestionar a canle.

Quen informa pode facelo de forma anónima, sen facilitar a súa identidade en ningún momento, e seguir o estado do seu caso mediante un recibo que só el conserva.

2. Quen pode ler unha denuncia

No día a día, o contido dunha denuncia léeo unicamente o xestor ou os xestores designados por cada organización. As denuncias cífranse coas súas chaves, e a ferramenta coa que se administra o servizo xestiona as contas e a configuración, nunca o contido: é cega ao que se denuncia.

Existe, e dise con claridade, unha vía excepcional de recuperación. Se un xestor perde o seu acceso, a súa organización quedaría sen poder ler as súas propias denuncias; para evitalo consérvase unha copia de recuperación da súa chave baixo custodia. Usala é un acto excepcional, esixe autorización expresa e deixa constancia no histórico. Non é un acceso ordinario nin se emprega para consultar denuncias.

Explícase así, e non cun «ninguén máis pode lelas», porque esa afirmación non sería certa en ningunha canle de denuncias que permita recuperar o acceso dun xestor. Preferimos que quen deposite unha denuncia o decida sabéndoo.

3. Só os datos imprescindibles, e nunca para outro fin

Do funcionamento da canle consérvanse os datos mínimos necesarios para operala e para acreditar o cumprimento dos prazos legais. Non se elaboran perfís, non se toman decisións automatizadas sobre as persoas e non se usa ningún dato da canle con fins comerciais.

Os avisos automáticos que o sistema envía ao operador —por exemplo, que unha denuncia leva días sen abrir— conteñen só metadatos (organización, xestor e datas) e nunca contido.

4. Prohibición de represalias

Ningunha persoa debe sufrir consecuencia adversa ningunha por ter informado de boa fe, nin por ter colaborado na investigación. Cando teñamos coñecemento dunha posible represalia nunha organización cliente, poñerémolo en coñecemento do responsable da canle desa organización.

5. Independencia fronte á organización cliente

Non intervimos no fondo das denuncias nin nas decisións que tome cada organización sobre elas. A nosa función é que a canle funcione, que os prazos se cumpran e que as garantías se respecten, mesmo cando iso resulte incómodo para quen contrata o servizo.

6. Os prazos cúmprense

Acuse de recibo no prazo de sete días desde a recepción, e resposta no prazo máximo de tres meses, conforme ao artigo 9 da Ley 2/2023. A canle avisa o xestor en canto entra unha denuncia; cumprir os prazos correspóndelle a quen a instrúe, non á ferramenta.

7. A canle interna non é a única vía

Usar a canle interna non priva de ningún dereito. Quen informa pode acudir ademais, ou no seu lugar, á Autoridad Independiente de Protección del Informante, ás autoridades autonómicas competentes, ou á policía e á fiscalía.

8. Quen opera a canle responde deste código

O incumprimento deste código por parte de calquera persoa desta sociedade é un asunto disciplinario. As dúbidas ou os incumprimentos comunícanse á dirección da sociedade en ps@greenaudit.net.